Prísurin fyri eina skráseting er eitt eingangsgjald á 100 DKK við MVG.
Ynskir tú at skráseta eitt djór, skalt tú melda teg til sum brúkara. Tá tú hevur meldað teg til og góðtikið treytirnar, fært tú ein teldupost sendandi. Hendan teldupostin skalt tú vátta. Tá telduposturin er váttaður, kanst tú skráseta eitt ella fleiri djór. Um djórið doyr, ber til at strika djórið.
Skiftir djórið eigara, kann fyrrverandi eigari flyta djórið til nýggjan eigara. Tískil kann skrásetingin eisini nýtast hjá alarum til at skráseta hvølpar, áðrenn teir fara í nýggj heim.
Chipmerking er ein tryggleiki, um djórið verður burtur.
Chipmerking fer fram hjá djóralækna. Merkingin er ikki pínuelvandi og kann gerast uttan doyving. Chipmerking verður gjørt við einari nál, sum inniheldur eitt microchip (microtranspondara). Microchippið hevur eitt serstakt nummar við 15 talteknum. Einki djór fær sama nummar, og merkingin er tískil eintýdd. Microchippið verður innsproytað undir húðina á vinstru síðu í nakkanum á djórinum og kann síðani verða lisið við einum chiplesara.
Tá djórið er merkt, kann tað skrásetast hjá Djóraskráseting Føroya. Chipnummarið kann verða lisið av øllum, sum hava ein lesara. Hetta eru djóralæknar, Djóraverndarfelagið, løgreglan og kommunur.
Tá djórið er chipmerkt, kann tað skrásetast hjá Djóraskráseting Føroya. Tað eru nógvir fyrimunir við at skráseta djórið í einum felags datastovni. Størsti fyrimunurin er tryggleikin fyri bæði djór og eigara.
Fyrimunir við at merkja og skráseta djór eru m.a., at djórið fær eitt sermerkt eyðmerkingarnummar, sum bert hetta djórið hevur. Verður djórið burtur ella kemur til skaða, er lættari at fáa samband við eigara hjá bæði djóralæknum og kommunum, um djórið er skrásett hjá Djóraskráseting Føroya. Stutt sagt, so ger skrásetingin lívið tryggari hjá djórunum.
Føroyskir djóraeigarir eru raskir at merkja djórini, men higartil eru merkt djór bert skrásett hjá tí djóralækna, sum hevur merkt tey, og hvørki kommuna, politi ella djóraverndarfelag hava havt atgongd til skrásetingina. Hetta hevur verið ein stórur ein trupulleiki, serliga í úrtíð og vikuskiftum. Verður djórið skrásett á Djóraskráseting Føroya, kunnu bæði djóralæknar, løgreglan, djóraverndarfelagið og tilmeldaðar kommunur leita eftir eigarum. Harvið kunnu burturblivin djór koma skjótari heim aftur til eigara sín.
Djóraskráseting Føroya er ein dátastovnur og leitimaskina fyri merkt djór. Dátastovnurin varð settur á stovn í 2019 av Anniku Nolsøe Nørspang, djóralækna. Hugskotið stavaði frá, at hon í fleiri ár hevði upplivað ein stóran tørv á einum felags dátastovni fyri merkt djór. Í londunum kring okkum finnast tílíkir dátastovnar, og nógvastaðni er skráseting av djórum lógarkrav.
Í starvi sínum sum djóralækni upplivdi Annika javnan, at burturvilst og skadd djór ikki fingu neyðugu viðgerð, tí tey ikki vóru merkt ella skrásett, og av hesu orsøk bar ikki til at fáa fatur á eigaranum. Ynski hennara var tí, at øll djór í Føroyum verða merkt og skrásett, so at tað gerst tryggari at vera djór í Føroyum.
Hin 2. mars 2024 tók Djóraverndarfelagið yvir dátastovnin, og reka vit hann nú við somu ynskjum og málum, sum dátastovnurin er bygdur á.
Hesi kunnu fáa upplýsingar í datastovninum:
